1Jo 2 | MHL | STEP | Aria yena muuk unowa, ni pina me oneka naep parosifa fain nia siisimomiyem. Nain mua-ko pina-ko oninon-na Yeesus Krais ikua, eena pina marewa, dubila ikaiya nain. Os-ke i emina-pa yiar iimarep i opora Auwa yia maakomiya.

1 John 2

Krais-na yia asipow mua-ke

1 Aria yena muuk unowa, ni pina me oneka naep parosifa fain nia siisimomiyem. Nain mua-ko pina-ko oninon-na Yeesus Krais ikua, eena pina marewa, dubila ikaiya nain. Os-ke i emina-pa yiar iimarep i opora Auwa yia maakomiya. 2 I pina onimik nain Mua Maneka-ke sirirowa yiiya. Nain os-ke pina yiar aawep ona mia-pa wame wueya Mua Maneka me yia siririya. Ne me i muutiw, miiw mua unowiya naapiw wia oniya.

3 N e o sira wuak nain baliwep wiar ookiyen-na maiyen, “O amisaremik,” eliw naap yiam maiyen. 4 Mua-ko mainon-na, “Yo o amisarem.” Naap maep sira me wiar ookinon-na, mua wadola-ke, ne opor makena kema-pa me wiar ikua. 5 Ne mua eena opora wiar ookiya nain, o kookaliyem naek nain makena, manek akena kookaliya. I Mua Maneka wameiya ikemik, ne opora nain makena arinok naep naap onowa-ke. 6 Feenap, mua-ko mainon-na, “Yo Mua Maneka wameiya ikem.” Naap maep-na o Yeesus sira wiar ookam-ikainok.

Mua eena mua oko saliwiya nain parina-pa ikua

7 Aria emar unowik, wia kookalowa sira maemi nia siisimomiyem fain me sira enuma-ke, weetak, awona-ke, iiriw eena ni Yeesus Krais opora opaman iir nain sira nia maakiwkin ookaman. Ne aakisa pun ookam-ikaiman, nain-keriw. Sira awona nain maiwkin iiriw miimaman. 8 Sira awona nain-ke, nain yo kiiriw opora enumiyem. Feenap, epa kokoma mesenaleya aakisa parin makena-ke wilinem-ikaiya, naapeya sira makena Krais mia-pa makena arek, ne sira nain nis pun niar ikua. 9 S ira feenap, mua-ko mainon-na, “Yo Yeesus parina-pa ikem.” Naap maek, nain Yeesus teeria mua oko me kookalinon-na mua nain epa kokoma-pariw ikua. 10 Ne mua eena Yeesus teeria mua oko wia kookaliya nain parina-pa ikua. Sira samora me wiar ikua, naeya maa mauwa-ke mika-suuweya pina-pa wakinon? Weetak. 11 Ne mua eena Yeesus teeria mua oko me wia kookaliya nain epa kokoma-pa ikua. Ne naap ikiwemi mokoka kokoma tenep era kookopiya.

12 Aria yena muuk unowa, Mua Maneka-ke Krais unuma-pa ni pina niar iirarek. Naapeya yo parosifa fain nia siisimomiyem.

13 Ne ni mua iperowa, ni Krais amisareman, eena miiwa me imenarowa ikaeya o iiriw ikua nain. Naapeya parosifa fain nia siisimomiyem. Ne ni takir ele-eliwa, ni Satan nomakeman. Naapeya parosifa fain nia siisimomiyem. Ne yena muuk unowa, ni Auwa baliwep amisareman. Naapeya parosifa fain nia siisimomiyem. 14 Ne ni mua iperowa, ni Krais amisareman, eena miiwa me imenarowa ikaeya o iiriw ikua nain. Ne ni takir ele-eliwa, ni kema pukeman. Mua Maneka opora ni kema-pa n iar ikua, naeya Satan nomakeman. Naapeya yo parosifa nia siisimomiyem.

I miiw sira me kookalikua

15 Aria ni miiw fain sira-pa miiw maa muutitik me kookaleka. Mua eena miiw maa muutitik kookaliya nain Mua Maneka me kookaliya. 16 Moram miiw sira fain me Auwa wiar ekapok, weetak, ona miiw mua-ke imenamik, wi pina mua eena maa nain kema manekiw ikaimik nain. Wi maa urufap mokoka kuimik nain, ne maa muutitik onaiya ikok yo yaisow naemi wiam pirimik, sira unowa nain. 17 Miiwa ne maa muutitik mua eena maa nain kema manekiw ikaimik nain wiimar iiwawun mesenalinon. Nain mua eena Mua Maneka kookalowa wiar ookiya nain anane maneka eliwa ikainon.

Krais iiwua iiriw imenaremik

18 Aria yena muuk unowa, miiwa weeserowa nain epa nan tiil arem-ikaiya. Ni iiriw feenap maiwkin miimaman, mua oko-ke ekapemi Krais iiwuaremi mainon, “Yo Krais-ke,” naap wame mainon. Ne aakisa mua unowa naap wiam maowa nain iiriw ekapemik. Naapeya i amisarep maimik, epa nan weeseriya. 19 Wi mua naap nain opora sira onaiya maemi i teeria-pa ikok yia piipuamik. Wi i sira epaskun ikekamik-na i yiamiya ikekamik. Nain yia piipuamik. Naapeya i amisarep maimik, wi nain me i teeria kakeniw-ke.

20 N ain Ewar Eliwa-ke oromi kema nieya unowiya opor makena amisareman. 21 Ne yo parosifa nia siisimomiyem fain me ni opor makena me amisariwkin siisimiyem, weetak. Ni opor makena amisareman, naap maep siisimiyem. Ne ni fain pun amisareman, opor makena era-pa wadola-ko me imenariya, weetak. 22 Aria mua kain mua wadola-ke? Mua eena feenap maiya nain, “Yeesus-na me Krais-ke,” naap maiya nain mua wadola-ke. O Krais iiwua-ke, Auwa Mua Maneka ona Muuka ikos makena-ke me wia naemi wia poraiya nain-ke. 23 Ne mua eena Muuka unuma poraiya nain Wiawi wameiya me wiar ikaiya. Aria mua eena Muuka makena-ke naiya nain Wiawi wameiya wiar ikaiya.

24 Ne ni iiriw Yeesus Krais opora opaman nain eena opora nia maakiwkin miimaman nain kema suuwam-ikeka. Ni opora nain kema suuwam-ikowen-na ni Mua Maneka Muuka ona Wiawi ikos kemena-pa wiar ikowen. 25 Ona opora yia maakep koonowak nain anane eliwa ikowa nain-ke.

26 Wi mua papako nia peeskimemi era oko nia pikiwimik, muut nain nia maakekam naep opor unowa fain nia siisimomiyem. 27 Aria ni iiriw Ewar Eliwa-ke niar orok. Ne ona kema niem-ikaiya, naeya mua oko-ke me nia maakikuan, ona nia maakem-ikaiya. Ne o opor unowa nain makena, me wadola-ke. Naapeya ni Ewar Eliwa opora wiar ookami Krais wameiya ikeka.

I Mua Maneka muuk teeria-ke

28 Ne yena muuk unowa, o wameiya ikeka. Naeya o nainiw ekapiya nain i unowiya emin ururowa marew kekanep o miira-pa ikaiyen. 29 Ne ni Krais amisareman, o mua kakeniw akena-ke. Ni nan amisareman, wi mua sira makena ookimik nain Mua Maneka muuk teeria-ke.